အခန်း(၁)/ အသံ

မှတ်ချက်။          ။   ကျုပ်မှာ နှလုံးသားတစ်ခု  ရှိတယ်။

                                ခင်ဗျားမှာ  နှလုံးသားတစ်ခု  ရှိတယ်။

                                 အဲဒီနှစ်ခုကို အပေါ်က လေးထောင့် သေတ္တာထဲမှာ ထည့်ထားတယ်။

                                                                        မင်းခိုက်စိုးစန်

                                                                          (၁၉၉၆)

            ထိုအရာသည်၊ အမှန်ပင်၊ ကဗျာတစ်ပုဒ်ဖြစ်၏။       ထိုကဗျာ၏၊ အစိတ်အပိုင်း၊ အားလုံးသည်၊ ကျွန်တော့်မျက်လုံးများ၊ အတွင်းသို့၊ အရှိန်ဖြင့်၊ ပြေးဝင်လာကာ၊ နားစည်များကို၊ အပြင်းအထန်၊ ထုနှက်၊ ရိုက်ပုတ်ကြ၏။ အံ့ဩချိန်မရခင်မှာပင်၊ နားစည်များတွင်၊ အသံများစွာ၊ ကြားနေရကြောင်း၊  ဦးနှောက်မှ၊ ပေးပို့လိုက်သော၊ ကေုးနန်းတစ်စောင်၊ လက်ခံရရှိလိုက်သည်။ ထိုအသံများ၏၊ စကားဝှက်ကို၊ ဘာသာပြန်ကြည့်သောအခါ၊ တချို့တစ်ဝက်သော၊ အဓိပ္ပာယ်များကို၊ ရမိလိုက်၏။ တချို့ကို၊ လက်လွှတ်လိုက်ရ၏။ အဓိက၊ ဖေါ်ထုတ်နိုင်ခဲ့သည်မှာ၊ ‘လူသားတို့၏နှလုံးသား’ ဟူသော၊ အဓိပ္ပာယ်နှင့်၊ ထိုနှလုံးသားကို၊ “သေတ္တာလေးထဲ ထည့်ထားသည် ဟူ‌သော၊ အဓိပ္ပာယ်တို့ပင် ဖြစ်သည်။ 

            အဘယ်သို့သော ၊ ကဗျာဆရာက၊ ထိုကဗျာကို၊ ရေးဖွဲ့ခဲ့ပါနည်း။ ထို ‘ကဗျာဆရာ’ သည်၊ အဘယ်သို့သော၊ ရေ‌မြေဝန်းကျင်တွင် ၊ ကြီးပြင်း၊ ရှင်သန်ခဲ့ပါသနည်း။

            အဘယ်သို့သော၊ အကြောင်းတရားများက၊ သန့်ရှင်းသော၊ နှလုံးခုန်သံတို့ကို၊ သေတ္တာတစ်ခုထဲ၊ သိုဝှက်ထည့်သွင်းစေဖို့၊ ထိုကဗျာဆရာကို၊ စေစားခဲ့ပါသနည်း။

            တိမ်ဖြူမျှင်၊ တချို့တစ်ဝက်၊ ကပ်ငြိနေသော၊ ပြလဲ့လဲ့၊ မိုးကောင်းကင်အောက်၊ စိမ်းမြမြ၊ မြက်ခင်းများအပေါ်၊ လေညင်းအေးအေးနှင့် စည်းချက်မှန်နေသော၊ နှလုံးခုန်သံတို့၏၊ လွတ်လပ်လင်းပွင့်စွာ၊ ရှင်သန်နေမှုကို၊ သူ၊ ဘာ့ကြောင့်၊ အကျဉ်းချချင်ပါသနည်း။

            မေးခွန်းများစွာဖြင့်၊ ရစ်ပတ်နေသော၊ ကျွန်တော်သည်၊ ကဗျာဆရာနှင့်၊ ထိုကဗျာဆရာ၏၊ သေတ္တာလေးကို၊ အလွန်အမင်း၊ စိတ်ဝင်စားသွားခဲ့ပါသည်။

            သည့်နောက် . . .၊

ဒီဂရီအမြင့်ဆုံးသော၊ စိတ်ဝင်စားမှု၊ စိတ်လှုပ်ရှားမှုတို့ဖြင့်၊ ထို သေတ္တာလေးထဲ၊ ကျွန်တော်၊ ခုန်ဝင်လိုက်မိသောအခါ၊  အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ အသံ၊ . . . . . . . . . . . . . 

ထိုသေတ္တာလေးထဲတွင်၊ နှလုံးခုန်သံပေါင်း များစွာ၊ ဆူညံ၊ မွတ်းကျပ်၊ ပိတ်လှောင်၊ နေပါသည်။

ကမ္ဘာပေါ်ရှိ၊ သံစုံထွက်သော၊ နာရီပေါင်းများစွာကို၊ အခန်းကျဉ်းတစ်ခုထဲ၊ ထည့်ကာ၊ မြည်ခိုင်းထားသလိုပင် …။

နာဇီအကျဉ်းစခန်းတစ်ခုအတွင်း၊ အဆိပ်ငွေ့ပေး၊ အသတ်ခံရမည့်ဆဲဆဲ၊ ပိတ်လှောင်ခံထားရသော၊ ဂျူးအကျဉ်းသားတို့၏ အော်ဟစ်ငိုကြွေးသံသည် ထိုအသံများဖြစ်နိုင်၏။

ပျော်ရွှင်လိုစိတ်၊ တစ်ခုတည်းဖြင့်၊ လူများ၊ ပြည့်သိပ်၊ ကြပ်ညှပ်နေသည့်၊ ဂီတပွဲတော်တစ်ခု၊ သို့၊ သွားရောက်စဉ်၊ ပြင်းထန်၊ ဆိုးရွားသော၊ ရန်ပွဲ၊ တစ်ခုကြောင့်၊ ကြောက်လန့်တကြား၊ ပြေးထွက်လာသော၊ လူအုပ်ကြီး၏၊ ‌ခြေသံသည်၊ ထိုသေတ္တာထဲမှ၊ လျှံထွက်နေခြင်းလည်း ဖြစ်နိုင်၏။

ထိုမြင်ကွင်းနှင့်၊ ထိုအသံတို့ကို၊ မခံနိုင်တော့သော၊ ကျွန်တော်သည်၊ ထိတ်လန့်တုန်လှုပ်ခြင်း၊ ပြင်းစွာဖြင့်၊ ထိုသေတ္တာထဲမှ၊ ခုန်ထွက်ဖို့၊ ကြိုးစားခဲ့ပါသည်။ မအောင်မြင်ခဲ့ပါ။ ထိုသေတ္တာထဲတွင်၊ ကျွန်တော်၊ သေသေချာချာ၊ ပိတ်မိ၊ အကျဉ်းကျနေခဲ့ပါသည်။

ကျွန်တော်၊ ကောင်းကင်ပြာကို၊ ကြည့်ချင်ပါသည်။  တိမ်ဖြူတို့ကို၊ ငေးရီလိုပါသည်။ အေးမြသော၊ မြက်ခင်းနှင့်၊ လေညင်းကို တမ်းမက်လာပါသည်။

သို့သော်၊ ကျွန်တော့်မှာ၊ ဘာအခွင့်အရေးမှ၊ မရှိတော့ပါ။

အမှန်တော့၊ ထိုအရာသည်၊ ကဗျာတစ်ပုဒ်၊ မဟုတ်ခဲ့။ မှော်အတတ်ဖြင့်၊ စီရင်ထားသော၊ ‘ကြေးမုံနံရံများ’၊ တပ်ဆင်ထားသည့် ထောင်ချောက်၊ အခန်းကျဉ်းတစ်ခုသာ၊ ဖြစ်ပါ၏။

*****

အခန်း(၂)/ သင်္ကေတ

ထိုအရာသည်၊ အမှန်ပင်၊ ဂီတ သင်္ကေတများ၊ ဖြစ်၏။

တစ်စုံတရာကို၊ ရယူဖို့၊ တစ်စုံတစ်ခု၊ ပြန်လည်ပေးဆပ်ရပါမည်။  ထို၊ ပေးဆပ်မှုကို၊ (ရူးသွပ်ခြင်း၊ ကြိုးပမ်းခြင်း၊ ဆုံးရှုံးခြင်း၊ အချိန်ဖြုန်းခြင်း၊ ပါရမီဖြည့်ခြင်း၊  . . . . . . . ခြင်း၊ . . . . . . . ခြင်း၊ ) စသည်ဖြင့်၊ နှစ်သက်ရာ၊ အမည်နာမ၊ ဆိုင်းဘုတ်တစ်ခုခု၊ တပ်ဆင်နိုင်ပါသည်။ သို့သော် . . . . . . . တစ်စုံတရာကို၊ ရယူဖို့၊ ပိုင်ဆိုင်ဖို့၊ တစ်စုံတစ်ခု၊ မုချ၊ ပြန်လည်၊ ပေးဆပ်ရပါမည် (မငြင်းဆန်ကြပါနှင့်)။ နယ်ပယ်သစ်၊ တစ်ခုဆီ၊ အရောက်၊ သွားဖို့၊ ကြိုးပမ်း၊ လေ့လာြခင်း၊ လမ်းမများ၊ မုချ၊ ဖောက်လုပ်ရပါမည်။ လမ်းမရှိဘဲ၊ ဟန်ရေးပြ၊ လမ်းလျှောက်ချင်သူတွေအတွက်၊ အချိန်ပေး၊ မဆွေးနွေးနေသင့်ပါ။ (လုံးဝ၊ သေချာလွန်းလှပါသည်)

3-D၊ ရုပ်ပုံကားများ၏။ ဇာတိမှန်၊ မြင်ရဖို့၊ အကြိမ်ကြိမ်၊ မျက်လုံးအစွေ၊ ကျင့်ရသလို၊ ထို၊ သင်္ကေတများထံမှ၊ နားနှင့်ဆတ်ဆတ်၊ အသံကြားရဖို့၊ အလွန်၊ ကြိုးပမ်းခဲ့ရပါသည်။

သွပ်ဆူးကြိုးတန်းတွင်၊ ချိတ်လှန်းထားသော၊ ပဲတီပင်ပေါက်လို၊ ထို သင်္ကေတများ၊ ထံမှ၊ အသံ၊ စတင်၊ ကြားရချိန်၌၊ အလွန်အမင်း၊ ပျော်ရွှင်ခဲ့ရပါသည်။ ပဉ္စလက်၊ အတတ်တစ်ခုကို၊ လက်ဝယ်၊ ပိုင်ပိုင်၊ ရယူနိုင်လိုက်သော၊ အချိန်ဟုလည်း၊ မှတ်တမ်း၊ ပြုထားပါသည်။ 

ထို၊ သင်္ကေတမှ၊ ပေးပို့လိုက်သော၊  သံစဉ်များ၏၊ ကိုယ်ထည်တွင်၊ လေထဲ၊ လွင့်မျောနေသော၊ ဖုန်မှုန့်များကို၊ မြင်လိုက်ရသည်။ ထင်ထင်ရှားရှား။

မျက်လုံးအစုံအောက်က၊ သင်္ကေတကို၊ နားထဲတွင်၊ သံစဉ်အဖြစ်ပြောင်း။

            ထို၊ သံစဉ်ကို၊ ပုံရိပ်များအဖြစ်၊ ထပ်ဆင့်၊ ပြောင်းလဲလိုက်မိချိန်တွင်၊ ခန္ဓာကိုယ်၊ တစ်ခုလုံးသည်၊ လေထဲ၊ လွင့်ပါလာသည့်၊ ဖုန်မှုန့်များ၊ အကြား၊ နာရီပေါင်းများစွာ၊ လွင့်မျော၊ လိမ့်ပါ၊ နေခဲ့ရသည်။ 

ထို၊ ဖြစ်စဉ်ကို၊ ပျင်းရိလာချိန်။

ထို၊ သင်္ကေတွင်၊ ရှိနေသည့်၊ သံစဉ်များ၏၊ ကျောကုန်းပေါ်တွင်၊ စကားလုံးသစ်၊ (ထိုအရာတို့သည် အနက်အဓိပ္ပာယ်သစ်များလည်း ဖြစ်နိုင်၏။) တချို့၊ ပြောင်းလဲတင်လိုက်မိသည်။

ထိုအခါ . . . . . . .

ယင်း၊ မူလသံစဉ်များကပင်၊ ကြေကွဲခြင်း၊ ငိုမြည်းတမ်းတခြင်း၊ တိုင်တည်ခြင်း၊ ပေါက်ကွဲခြင်း။ ရုန်းကန်ဖေါက်ထွက်လိုခြင်း၊ ဟူသော၊ ခံစားမှုများကို၊ ခန္ဓာကိုယ်အနှံ့၊ ဖြည့်တင်း၊ ထိုးသွင်း၊ ပေးလိုက်ပါသည်။

သည့်နောက် . . . . . . .

တုန်လှုပ်၊ အံ့ဩဖွယ်၊ ကြည်နူး၊ ပျော်ရွှင်ဖွယ်၊ ရသတစ်ခုသည်၊ တစ်ကိုယ်လုံးထဲတွင်၊ ငြိမ့်ညောင်းစွာ၊ စီးပျံ့နေတော့၏။

သည့်နောက် . . . . . . .

ထို သင်္ကေတများကိုပင်၊ စကားလုံးသစ်များ၊ ထပ်ပြန်တလဲလဲ၊ ဖြည့်သွင်းခြင်းဖြင့်သာ၊ ငယ်ဘဝက၊ ကြည့်မဝခဲ့သော၊ ရောင်စုံ၊ ပန်းစကြာ၊ မှန်ပြောင်းကြီးသည်၊ ပိုမို၊ ကြီးမား၊ ခန့်ထည်လာတော့သည်။ 

ထိုဖြစ်စဉ်များကို၊ ကိုယ်တွေ့ခံစားနိုင်ဖို့

(၁) လျှပ်စစ်ဓာတ်အား မလိုပါ။

(၂) ဓာတ်ပြားဖွင့်စက်၊ တိပ်ရီကော်ဒါ၊ ကက်ဆက်တစ်လုံး၊  မလိုပါ။

(၃) CD ဓာတ်ပြားတစ်ချပ်၊ တိပ်ခွေတစ်ခု  မလိုပါ။

(၄) တေးရေး၊ တေးဆို၊ တီးခတ်၊ အသံသွင်း၊ ြဖန့်ချိသူ  မလိုပါ။

အမှန်လိုအပ်သည်မှာ  . . . . . . .

သင်္ကေတများထံမှ၊ အသံကြားနိုင်သော ….၊

ထိုအသံများကို၊ အဓိပ္ပာယ်တစ်ခု၊ ဖော်ဆောင်သည့်/ပေါ်လွင်သည့်၊ အရုပ်အဖြစ်၊ ပြောင်းလဲနိုင်သော . . . . . . . .။

ထိုဖြစ်စဉ်ကို၊  ငြီးငွေ့ချိန် (သို့မဟုတ်) သင့်လျော်ချိန်တွင်

ထို၊ အသံများကိုပင်၊ တခြားတခြားသော၊ အဓိပ္ပာယ်ဆောင်သည့်၊ အရုပ်များအဖြစ်၊ ထပ်ဆင့်၊ ပြောင်းနိုင်စွမ်းရှိသော၊ အတတ်ပညာ၊ တစ်ခုသာ ၊ ဖြစ်ပါသည်။

အမှန်တော့၊ ထို၊ အရာတို့သည်၊ ဂီတသင်္ကေတများ၊ မဟုတ်ခဲ့။

မှော်အတတ်ဖြင့်၊ စီရင်ထားသော၊ လွတ်လပ်သည့်၊ မိုးကောင်းကင်တစ်ခု၊ လူပေါင်းများစွာ၊ တင်ဆောင်၍၊ လိုရာ၊ မောင်းနှင်နိုင်သည့်၊ ယာဉ်ရထားတစ်စီးသာ၊ ဖြစ်ပါသည်။

အခန်း(၃)/ တပ်ဆင်ထားသောအလင်း

ထိုအရာသည်၊ အမှန်ပင်၊ အလင်းရောင်များကို၊ တပ်ဆင်ထားသည့်၊ နံရံတစ်ချပ်၊ ဖြစ်သည်။

ထိုနံရံပေါ်တွင်၊ 

(၁) ထိုင်းနိုင်ငံလုပ်၊ (ကျွမ်းနေသော) ဘတ်သီးတစ်လုံး။

(၂) ဂျာမနီလုပ်၊ ဖန်မီးအိမ်တစ်ခု။

(၃) မြန်မာပြည်လုပ်၊ စိတ်ပုတီးတစ်ကုံးတို့၊ စုဖွဲ့၊ ငြိမ်သက် နေကြသည်။

ထို၊ အစုအစည်းလေး၏၊ အောက်ခြေတွင်၊ အထက်ပါ၊ စာတမ်းငယ်တစ်ခု၊ ကပ်ထားသည်။

၎င်းအစုအဖွဲ့တွင်၊ လျှပ်စစ်မှရသည့်၊ အလင်းသည်လည်းကောင်း၊ ရေနံဆီမှ ရသည့်၊ အလင်းသည်လည်းကောင်း၊ သတိ သမာဓိ ဉာဏ်ပညာမှ ရသည့်၊ အလင်းသည်လည်းကောင်း၊ ပျောက်ဆုံးလျက်ရှိသည်။ သူတို့သည်၊ အလင်းမဲ့ကမ္ဘာ၊ အမှောင်ခြမ်း၌၊ ရောက်ရှိနေကြသော၊  အစွမ်းအစမဲ့များဖြစ်ကြ၏။

ထိုအရာသည်၊ အနုပညာပစ္စည်းတစ်ခုလား၊ အတွေးတစ်စလား၊ သင်္ကေတလား၊ စကားဝှက်လား၊ ပြက်လုံးလား၊ ကြည့်မိသူတိုင်းကို၊ အဓိပ္ပာယ်မှန်အောင် ဖြေခိုင်းနေသည်။ ဒါမှမဟုတ် … ဉာဏ်စမ်းပဟေဠိတစ်ပုဒ်လား။

(သင်၊ နှစ်သက်သလို၊ သတ်မှတ်၊ ခံစားနိုင်ပါသည်။)

(စိတ်ဝင်စားပါက၊ ကြိုက်သလို၊ ဘာသာပြန်နိုင်ပါသည်။)

တစ်ခုတော့ ရှိပါသည်။

ကျွမ်းနေသော၊ ဘတ်သီးတစ်လုံး၊ ဆီနှင့် မီးဇာမရှိသော၊ ဖန်မီးအိမ်တစ်လုံး၊ မိမိကိုယ်မိမိ၊ ဘာသာရေးသမားအဖြစ်၊ အမြဲ၊ ကြွေးကြော်နေလေ့ရှိသူတစ်ဦး၏၊ ဘယ်တုန်းကမှ ၊ မစိပ်ပဲ၊ ပစ်ထားသော မှိုတက်နေသည့်၊ ပုတီးတစ်ကုံးတို့ကို၊ စုပေါင်း၊ တပ်ဆင်ထားကြောင်း၊ အဖြစ်မှန်ကိုတော့၊ သင်၊ သိဖို့၊ လိုအပ်ကောင်း၊ လိုအပ်ပါမည်။ (လိုအပ်ချင်မှလည်း၊ လိုအပ်ပါမည်။)

ထိုအရာသည်၊ အမှန်ပင်၊ ပကတိအလင်း/ဉာဏ် အလင်းရောင်များ၊ ပျောက်ဆုံးနေကြသော၊ ပစ္စည်းများ၊ ဖြစ်ကြပါသည်။

အခန်း(၄)/ အသံ၊ သင်္ကေတနှင့် တပ်ဆင်ထားသောအလင်း

အခန်း(၁)သည် . . . . . . .

တစ်ပါးသူ၊ သိုဝှက်ထားသော၊ လျို့ဝှက်ချက်၊ များကို၊ စပ်စုစွာ၊ ခိုးကြည့်ရင်း၊ အကျဉ်းကျသွားသူ၊ တစ်ယောက်၊ အကြောင်းဖြစ်သည်။

အခန်း(၂)သည် . . . . . . .

သင်္ကေတများကို၊ ဖတ်တတ်ရန်၊ ကြိုးစားရင်း၊ ထို၊ သင်္ကေတများ၊ ထံတွင်၊ သူလိုချင်သော၊ အဓိပ္ပာယ်များ၊ ထည့်သွင်း၊ နားထောင်ရင်း၊ ပီတိဖြစ်နေသူ၊ တစ်ယောက်၊ အကြောင်းဖြစ်သည်။

အခန်း(၃)သည် . . . . . . .

သူပြောလိုသမျှကို၊ ဖုံးဖုံးဖိဖိ၊ ပြောတတ်ပြီး၊ သူပြောသမျှ၊ တစ်ပါးသူ၊ နားမလည်မည်ကို၊ အစိုးရိမ်ကြီးနေသော၊ အူလည်လည်၊ အတတ၊ လူတစ်ယောက်အကြောင်းဖြစ်သည်။

အခန်း(၅)/ တစ်စုံတရာ

• အထက်အကြောင်းအရာသည် စာရေးသူရင်ထဲက တစ်စုံတရာကို ဖေါ်ပြထားခြင်း ဖြစ်ပါသည်။
• အောက်ပါကွက်လပ်ကို စာဖတ်သူရင်ထဲက တစ်စုံတရာ ဖော်ပြနိုင်ရန် ချန်လှပ်ထားခဲ့ပါသည်။

December 16, 1996 at 12:36 PM, Yangon.